«Роздум. Беларусь – агульны дом». Радыёблог Навума Гальпяровіча (аўдыё)

• Перадача: Радыёблог
• Дата: 06.06.2022

Той, хто пабываў у цудоўным горадзе Гродна падчас фестываляў нацыянальных культур, назаўсёды запомніў радаснае людское мора, якое віравала на цэнтральных вуліцах старажытнага горада, яркія нацыянальныя касцюмы, песні на розных мовах, прыгожыя танцы.

А яшчэ падвор'і нацыянальных суполак,дзе можна было пакаштаваць узбекскі плоў і беларускія дранікі, літоўскія цэпеліны і яўрэйскую мацу…

Прадстаўнікі больш як сотні нацыянальнасцяў нашай краіны збіраюцца на гэтае свята, каб прадэманстраваўшы прывязанасць і захаванне сваіх нацыянальных традыцый, выказаць любоў да сваёй сённяшняй Радзімы – Беларусі.

Так сталася, што за той час, калі мне даверылі ўзначальваць таварыства «Беларусь–Арменія» рэспубліканскага Дома дружбы, мне давялося пазнаёміцца з многімі цудоўнымі людзьмі, якія любяць сваю мову, свае традыцыі, але сталі паўнапраўнымі грамадзянамі нашай сінявокай краіны.

Армен Сяргеевіч Сардараў, з якім мяне звязвае даўняе сяброўства, аўтар многіх помнікаў на нашай зямлі, выхоўвае беларускіх архітэктараў, выдатна валодае беларускай мовай. З ім мы разам выдалі кнігу-альбом «Маці зямля».

А Георгій Анушаванавіч Егіазаран, які ўзначальвае таварыства армянскай культуры «Аястан», актыўна ўдзельнічае ў грамадскім жыцці нашай краіны, адзін з кіраўнікоў айчыннай грамадзянскай авіацыі.

Ансамбль народнага танца «Эрэбуні» прадстаўляе нашу краіну на міжнародных фестывалях, заваяваў шмат прызоў.

А азербайджанец Націк Багіраў праславіў Беларусь на многіх прэстыжных спаборніцвах і горда нёс сцяг Беларусі у спартыўных залах свету.

Аматары эстраднай музыкі добра ведаюць спявачак Гюнеш і Стэлу, спевака Тарыела Майсурадзе. Асабліва пранікнёна і ярка Тарыел спявае беларускія народныя песні.

Ды ў чарговым фестывалі бралі ўдзел не толькі гэтыя зоркі. Сотні звычайных інжынераў, рабочых, дактароў і настаўнікаў аб'ядноўваць нацыянальныя таварыствы.

А фестываль, які прайшоў у гэтыя дні ўжо 13-ты раз, створаны з мэтай яднання народаў Рэспублікі Беларусь, развіцця міжнацыянальнага сяброўства, адраджэння, культурных традыцый, нацыянальных супольнасцей, адлюстравання культурнай разнастайнасці беларускага грамадства.

Сёлетні год аб'яўлены Годам гістарычнай памяці, таму сімвалічна, што з удзелам ганаровых гасцей фестываля у парку імя Жылібера прайшла цырымонія ускладання вянкоў да брацкай магілы воінаў і партызан, якія загінуліі ў гады Вялікай Айчыннай вайны, а ў галерэі імя Тызенгаўза адбыўся круглы стол «Беларусь – наш агульны дом: адзінства нацый і пакаленняў».

Арганічна ў праграму фестывалю ўвайшлі выставачныя праекты «Адзінства народаў – залог Вялікай Перамогі» і «Беларусь – наш адзіны дом».

Усяго ў праграму фестывалю было ўключана каля 50 мерапрыемстваў.

Але самае галоўнае – тая атмасфера сяброўства еднасці, братэрства, што вельмі важна ў наш час, калі на нацыянальнай глебе ўзнікаюць канфлікты, калі ажываюць ідэі нацыянальнай нецярпімасці, ксенафобіі і нацызму.

Свята нацыянальных культур, якое праводзіцца ў нашай краіне, яшчэ раз даказала, пра што адзначалі яго ўдзельнікішто мова культуры зразумелая ўсім, што трэба паказваць добрыя эмоцыі, каб было прыемна тварыць на карысць нашай Беларусі.