“Роздум. Гаючая сіла мастацтва”. Радыёблог Навума Гальпяровіча (аўдыё)

• Перадача: Радыёблог
• Дата: 23.04.2020

Мне пашанцавала, што ў маім дзяцінстве я чуў, як спяваюць летнімі вечарамі жанчыны. Так ужо не спяваюць зараз, хіба толькі за бяседным сталом, або моладзь у гарадскіх дварах пад гітару.

А ў нашым прыгарадным пасёлку пасля працы збіраліся на лавачках суседкі і спявалі. Тады я ўпершыню менавіта ад іх пачуў і “Купалінку”, і “Ой, хацела ж мяне маць...”, і “Зялёную вішню”, якая з пад кораня выйшла…

Так што калі па радыё перадавалі перадачы пра народны фальклор, я адразу ўзгадваў суседак цётку Галю і цётку Ядзю, якія так хораша і душэўна спявалі гэтыя песні.

Людзі спявалі, танчылі, малявалі ў самыя цяжкія часы – у вайну, недарод, іншыя навалы, якія выпадалі на іх лёс.

Неверагодная сіла мастацтва трымала і давала сілы, мужнасць і стойкасць.

Колькі цудоўных песень нарадзілася ў суровыя гады Вялікай Айчыннай. Людзі на фронце і ў тыле спявалі і “Кацюшу” і “Аганёк”, і “Цёмную ноч”, і “Ой, бярозы і сосны”.

А вершы… Неўміручыя купалавы радкі, “Жди меня” Канстанціна Сіманава, вершы Аляксандра Твардоўскага, нашых Аркадзя Куляшова, Петруся Броўкі, Пятра Глебкі, Міколы Сурначова…

Песні і вершы дапамагалі і стваралі настрой, давалі сілы на барацьбу і трываласць.

Аказваецца, гэта вельмі важна і неабходна, асабліва, калі на сэрцы трывога і роспач, калі трэба падняцца над сваімі змрочнымі думкамі, адчуць прыліў стваральнай энергіі і духоўнай сілы.

Гэта мы назіраем і цяпер, калі ў свеце бушуе вірусная ліхаманка, калі людзі шукаюць апірышча і трываласць. Сёння медыкі, як тыя салдаты на франтах, ідуць у бой за перамогу над нябачным, але вельмі каварным і агрэсіўным ворагам.

І тут на дапамогу прыходзіць мастацтва.

Менвіта таму наша радыё аб’явіла акцыю “Творчасць у імя будучыні”. Мэтай акцыі з’яўляецца аб’яднанне намяганняў па падтрымцы ўсіх, хто ў гэтыя дні супрацьстаіць эпідэміялагічным выклікам і хто апынуўся ў няпростай жыццёвай сітуацыі.

У рамках акцыі ўпершыню ў відэафармаце сабраліся і ўдзельнікі рэспубліканскага творчага конкурсу “Маладыя таленты Беларусі”.

За ходам акцыі вы можаце сачыць, слухаючы нашы праграмы.

Да мастацкіх акцый, відэачытанняў класікі і сучасных пісьменнікаў падключыліся творчыя саюзы, бібліятэкі, сродкі масавай інфармацыі, асобныя творцы.

Даць сілы і трываласці дапамагаюць творы Караткевіча і Шамякіна, Быкава і Панчанкі, сучасных аўтараў.

Слова – таксама зброя і лекі, магутныя па ўздзеянні, гатовыя абараніць і падтрымаць.

Мы яшчэ раз адчуваем, наколькі патрэбна нам у паўсядзённым жыцці сапраўднае мастацтва, як яно прыходзіць на дапамогу ў складаны і нялёгкі час.