“Роздум. Што прынясе бумеранг?” Радыёблог Навума Гальпяровіча (аўдыё)

• Перадача: Радыёблог
• Дата: 05.03.2020

Пра гэты выпадак мне распавёў блізкі сябра. Выходзячы з таксі ля свайго пад’езда, ён выраніў кашалёк з даволі буйной сумай грошай, банкаўскай карткай, праязным білетам.

Пра тое, што выраніў, высветлілася пазней, а ў той момант, назаўтра, выявіўшы прапажу, бедалага пачаў шукаць таксіста, аблазіў усё дома і ля пад’езда. Але кашалька не было, і таксіст заявіў, што нічога такога ў машыне не знайшоў.

Было ўжо прымірыўся сябар са стратай, але праз дзень увечары ў кватэры раздаўся тэлефонны званок, і жаночы голас, прадставіўшыся участковым інспектарам міліцыі, запытаў, ці не страчваў гаспадар што-небудзь. Пачуўшы сцвярджальны адказ, жанчына запрасіла ў апорны пункт правапарадку, каб атрымаць знаходку.

У знойдзеным кашальку было ўсё на месцы. Аказваецца, знаходку ў той жа вечар прынесла ў міліцыю маладая жанчына. І там аператыўна высветлілі, каму належала прапажа, адшукалі адрас і нумар тэлефона гаспадара, вярнуўшы яму страчанае.

Даведаўщыся ад інспетара нумар тэлефона жанчыны, сябра тут жа патэлефанаваў і выказаў словы падзякі.

“Я сама некалі была ў такой сітуацыі, – сказала жанчына, і таму вельмі добра разумею вашы пачуцці. Хай заўсёды бумеранг вяртаецца толькі добрымі звесткамі.”

І тут я прыгадаў даўнюю сваю гісторыю. Аднойчы ў камандзіроўцы я згубіў ці, дакладней, у мяне выцягнулі партманэ з дакументамі і грашыма. Асабліва расстроіла мяне прапажа пашпарта, бо неўзабаве трэба было афармляць дакументы для іншай камандзіроўкі за мяжу.

Я ўжо было падрыхтваўся пісаць заяву аб прапажы ў міліцыю, як убачыў у паштовай скрыні паштоўку.

Невядомы аўтар паведамляў, што знайшоў мой пашпарт, але верне мне толькі пасля таго, як я пералічу на яго рахунак грашовае ўзнагароджанне...

Вось такія падобныя і ў той жа час не падобныя выпадкі.

Успомнілася, як мне казала ў дзяцінстве мама, што, калі знойдзеш што чужое, якое нехта згубіў, пастарайся адшукаць гаспадара ці аддаць таму, хто яго адшукае.

“На чужой бядзе шчасце не атрымаеш", – казала маці.

Сапраўды, бумеранг вяртаецца тым, з чым яго паслалі. І мне вельмі верыцца, што бумеранг дабрыні і спагады ўсё ж часцей будзе вяртацца да нас з добрымі, а не благімі звесткамі.

Важна, каб мы яго толькі з такой дабрынёй пасылалі.