Падзяліцца:
Адлюстраванні. Радыйная сага Народнай артысткі. Радыёблог Галіны Шаблінскай (аўдыё)
23 Лістапада 2016
Адлюстраванні. Радыйная сага Народнай артысткі. Радыёблог Галіны Шаблінскай (аўдыё) Вітаю вас, шаноўныя слухачы! Увесь гэты тыдзень для прыхільнікаў Мельпамены пройдзе пад знакам Нацыянальнай тэатральнай прэміі. Менавіта з 21 па 26 лістапада ў Мінску адбываецца заключны этап ІV Рэспубліканскага конкурсу тэатральнага мастацтва. Пляцоўкай для ўрачыстай цырымоніі ўзнагароджванняў пераможцаў стане Купалаўскі тэатр, на сцэне якога і адкрыўся ў панядзелак конкурсны тыдзень -- чэхаўскай “Чайкай”. Так сімвалічна супала, што ў гэты дзень нарадзілася прыма Нацыянальнага акадэмічнага тэатра імя Янкі Купалы народная артыстка Беларусі Марыя Захарэвіч, якому яна служыць амаль 60 гадоў. У розных пакаленняў гледачоў – свая Захарэвіч. Я помню Марыю Георгіеўну з 70-х: Ганна Чарнушка ў “Людзях на балоце” Івана Мележа, Марыя ў “Святая святых” Іонэ Друцэ, Камісар у “Аптымістычнай трагедыі” Усевалада Вішнеўскага, Наталля Фадзееўна ў спектаклі “І змоўклі птушкі” Івана Шамякіна. Потым было шмат іншых цудоўных сустрэч ў Купалаўскім. Кожны раз яе гераіні зачароўвалі прыгажосцю і ахвярнасцю, уздымалі моцай свайго характару, нязменна сцвярджаючы жаночую годнасць. Яе хацелася бачыць і чуць, верыць праўдзівасці і цеплыні створаных ёю сцэнічных вобразаў. Але ў Марыі Георгіеўны Захарэвіч ёсць яшчэ адно цудоўнае амплуа. У яе творчым актыве – сотні роляў, сыграных ў радыёспектаклях і пастаноўках, яна – выключны майстра мастацкага чытання ў радыёэфіры. Сапраўды, без перабольшвання, можна гаварыць пра радыётэатр Марыі Захарэвіч на Беларускім радыё, творчае супрацоўніцтва з якім доўжыцца, напэўна, столькі ж, колькі і праца артысткі ў Купалаўскім тэатры. Радыйная біяграфія Марыі Захарэвіч – прыклад таго благаславёнага супадзення, калі асоба, час і атмасфера пошуку знаходзяцца ў адной плоскасці. Аднак жа перадусім -- асоба артысткі. Бо што такое талент? Боскі дар сто разоў памножаны на працу і яшчэ раз працу. Па словах самой Марыі Георгіеўны, “калі ты не патрацішся, нічога не атрымаецца”. І яна ніколі не шкадавала сябе. Радыйны мікрафон, самы чуйны інструмент да ўсялякага фальшу голасу і душы, толькі ўзмацняў вобразы яе гераінь, захоўваючы крохкую мяжу шчырасці і глыбіні. Гэта выдатна разумелі ўсе радыёрэжысёры і кожны запрашаў Захарэвіч да ўдзелу ў сваіх спектаклях. Але самы плённы творчы тандэм склаўся з Соф’яй Гурыч. Гэты быў той самы шчаслівы выпадак, калі артыст і рэжысёр размаўляюць на адной мове. Не ў сэнсе поўнай згоды, а найперш адчування высокай задачы сваёй працы і адпаведнай адказнасці за яе. Дарэчы, радыёспектакль “Рыбакова хата” паводле аднайменнай паэмы Якуба Коласа ў пастаноўцы Соф’і Гурыч, дзе ў галоўных ролях Данілы і Марыны Смык заняты народныя артысты Беларусі Валянцін Белахвосцік і Марыя Захарэвіч, атрымаў у свой час Дзяржаўную прэмію Беларусі. А колькі выдатных твораў беларускай літаратуры прачытана ў эфір Марыяй Захарэвіч! Яе голас заўсёды чакаюць прыхільнікі паэзіі і прозы. Эмацыянальная ўзрушанасць і сардэчная глыбіня выканання робяць сапраўдныя цуды! Слова набывае іншую вагомасць, яно стварае выразны свет вобразаў і пачуццяў, якія перадаюць слухачу энергію аўтарскай думкі і вышыню духу. А яшчэ пераконваюць у якасці напісанага. Напэўна, наша агульнае захапленне выключным талентам Актрысы можна выказаць радкамі народнага паэта Беларусі Рыгора Барадуліна: Чытае вершы Захарэвіч, Нібы сыходзіш на зямлю. І звечарэеш, Захварэеш Жаданнем выгукнуць - Люблю! І захварэеш невылечна Забытай прагай чысціні. Ад слоў душы, як небу, Млечна. Нанова кожны гук цані!.. З юбілеем Вас, дарагая і шаноўная Марыя Георгіеўна! Няхай Ваша радыйная сага працягваецца і далей на радасць нашым слухачам, а таксама дорыць Вам самой хвіліны творчага шчасця!
Каб пакінуць каментар, аўтарызуйцеся:
Войти как пользователь
Вы можете войти на сайт, если вы зарегистрированы на одном из этих сервисов: