Падзяліцца:
«Адлюстраванні. Літаратурны студзень». Радыёблог Галіны Шаблінскай (аўдыё)
21 Студзеня 2019
«Адлюстраванні. Літаратурны студзень». Радыёблог Галіны Шаблінскай (аўдыё) «Адлюстраванні. Літаратурны студзень». Радыёблог Галіны Шаблінскай (аўдыё) Літаратурны студзень сабраў шмат святочных падзей на сваёй палітры. Адной з новых фарбаў літаральна ў мінулую пятніцу, 18 студзеня, сталася адкрыццё мастацка-літаратурнай экспазіцыі “Сведкі вечнасці”, прымеркаванай да святкавання Вадохрышча. Арганізатарамі выступілі Дзяржаўны музей гісторыі беларускай літаратуры і Музей старажытнабеларускай культуры Цэнтра даследаванняў беларускай культуры, мовы і літаратуры Нацыянальнай акадэміі навук Беларусі. На выставе прадстаўлены абразы з фондаў Музея старажытнабеларускай культуры, якія знаёмяць нас з развіццём іканапісу на беларускіх землях у ХVІІІ-ХІХ стагоддзях. Гэта і выявы хрысціянскіх святых, і кампазіцыі, якія ілюструюць асобныя сюжэты Святога Пісання, і шматлікія прыклады ўвасаблення Божай Маці. Не меншую цікавасць і захапленне выклікае і унікальная калекцыя рэдкіх выданняў ХVІІ-ХVІІІ стагоддзяў з фондаў музея гісторыі беларускай літаратуры. Напрыклад, “Выбранае з ветхазаветнай гісторыі” 1769 года, “Триодь постная” 1609-га, “Псалтирь” 1789-га, “Альфа и Омега” 1786-га ды іншыя. Хацелася б падкрэсліць яшчэ і той факт, што апошнім часам музейшчыкі ўсё часцей ладзяць сумесныя партнёрскія праекты, што дае асаблівы плён для наведвальнікаў. Між іншым нагадаю, што ў Дзяржаўным музеі гісторыі беларускай літаратуры працягвае працаваць часовая літаратурна-дакументальная экспазіцыя “Уладзімір Караткевіч. Абуджаная памяць…”, да паўстагоддзя выдання культавага рамана класіка “Каласы пад сярпом тваім”. Варта падняцца на другі паверх і вы патрапіце ў зусім іншы свет другой паловы ХХ стагоддзя. У студзені стала вядома пра завяршэнне выдання персанальнай энцыклапедыі “Янка Купала” ў трох тамах. Гэты амбітны выдавецкі праект, які быў распачаты да 135-годдзя з дня нараджэння народнага песняра, ажыццявіла выдавецтва “Беларуская энцыклапедыя імя Петруся Броўкі”, а працавалі над ім больш за тысячу чалавек. Яму, дарэчы, папярэднічаў аднатомнік – энцыклапедычны даведнік “Янка Купала”, які выдаваўся яшчэ за савецкім часам, у 1986-м годзе. Цяпер, у новым выданні, можна знайсці любую, патрэбную вам інфармацыю пра жыццё і творчасць класіка беларускай літаратуры. Яшчэ для аднаго беларускага класіка – Ядвігіна Ш. сёлетні студзень пазначаны юбілейнай фарбай. 150 гадоў з дня яго нараджэння, сапраўднае прозвішча пісьменніка Антон Лявіцкі. Адзін з першых значных празаікаў ХХ стагоддзя, талент якога раскрыўся ў “Нашай ніве”, дзе ён быў загадчыкам літаратурнага аддзела. Выдаў зборнікі прозы “Бярозка”, “Васількі”, “Апавяданні”, кнігу “Успаміны”. У гісторыі новай беларускай літаратуры Ядвігін Ш. застаўся і як аўтар аднаго з першых псіхалагічных раманаў “Золата”. Яго пачынанне працягнулі ў сваёй творчасці потым Максім Гарэцкі, Кузьма Чорны, іншыя вядомыя празаікі – нашы сучаснікі. 90-гадовы юбілей у гэтым студзені і ў вядомага крытыка і літаратуразнаўца, прафесара, лаўрэата Дзяржаўнай прэміі Беларусі імя Якуба Коласа за кнігу “Талент і праца” Дзмітрыя Бугаёва. Напэўна, якраз гэтыя два словы “талент” і “ праца” – ключавыя ў біяграфіі Дзмітрыя Якаўлевіча. Як сапраўдны вучоны, ён сказаў сваё важкае, праўдзівае слова пра лепшыя творы беларускай літаратуры, пра творчы лёс многіх выдатных пісьменнікаў: Янкі Брыля, Васіля Быкава, Уладзіміра Дубоўкі, Алеся Адамовіча, Максіма Танка, Аркадзя Куляшова, Уладзіміра Караткевіча, Яўгеніі Янішчыц, Віктара Казько ды іншых. Яго кнігі па літаратуразнаўству і крытыцы трэба чытаць, каб разумець ступень адказнасці і мужнасці самога аўтара. Дарэчы, Дзмітрый Якаўлевіч Бугаёў ахвотна супрацоўнічаў і з Беларускім радыё. Сустрэчы з ім ля студыйнага мікрафона заўсёды пакідалі адчуванне вельмі глыбокага, удумлівага субяседніка, які цудоўна валодае праблемамі літаратуры, на ўсе пытанні мае сваю абгрунтаваную пазіцыю. І яшчэ пра літаратурны студзень. Як раз гэтымі днямі была абвешчана інфармацыя пра ХХVІ Мінскую міжнародную кніжную выставу-кірмаш, што пройдзе з 6 па 10 лютага. Пра яе галоўныя падзеі і вынікі абяцаю паразважаць ў наступным, лютаўскім, “Радыёблогу”.
Каб пакінуць каментар, аўтарызуйцеся:
Войти как пользователь
Вы можете войти на сайт, если вы зарегистрированы на одном из этих сервисов: