Падзяліцца:
«Па-сутнасці. Уласныя гены падкажуць, як жыць?» Радыёблог Алены Швайко (аўдыё)
31 Кастрычніка 2018
«Па-сутнасці. Уласныя гены падкажуць, як жыць?» Радыёблог Алены Швайко (аўдыё) Кажуць, статыстыка — лепшы доказ чалавеку, які ў чымсьці сумняваецца; нядаўна зайшла спрэчка сярод знаёмых урачоў, што ўплывае на працягласць нашага жыцця. А ўрачы гэтыя доўгі час працавалі ў Японіі. Больш за ўсё доўгажыхароў менавіта там – цудоўны клімат, добрая экалогія, японцы шмат ужываюць морапрадуктаў, амаль не ўжываюць алкаголь, шмат рухаюцца. Дарэчы, калі прытрымлівацца логікі, то абсалютна такія ж аргументы на карысць доўгажыхарства і ў Італіі, Бразіліі, Іспаніі, Аўстраліі. Калі браць Беларусь, то ў нас жыве каля 400 чалавек старэйшых за 100 гадоў. У асноўным – у Віцебскай, Гродзенскай, Мінскай абласцях. Для статыстыкі — малавата. Сапраўды, клімат, экалогія, марское паветра, дзе шмат ёду і мікраэлементаў, харчаванне — ўсё мае вялікую карысць для жыцця чалавека, для яго працяглага і паўнацэннага жыцця. Але ёсць яшчэ і генетыка нацыі, якая спрацоўвае ў стрэсавых жыццёвых сітуацыях, зберагае генафонд і ўплывае на тое ж доўгажыхарства. Надзвычай цікавую сумесную работу вырашылі правесці вучоныя-генетыкі Беларусі і Сардзініі. Работу па генетыцы даўгалецця. Як расказала вядучы навуковы супрацоўнік лабараторыі экалагічнай генетыкі і біятэхналогій Інстытута генетыкі і цыталогіі Нацыянальнай акадэміі навук Алена Міхаленка, пачынаецца супрацоўніцтва беларускіх вучоных з кафедрай геранталогіі Беларускай медыцынскай акадэміі паслядыпломнай адукацыі і з універсітэтам Кальяры на Сардзініі. Гэты востраў – адзін з пяці рэгіёнаў свету, дзе найбольшая колькасць доўгажыхароў. Мэта такой міжнароднай навуковай работы, а дакладней, эксперыменту – не толькі вывучыць генетычныя асаблівасці жыхароў і Беларусі, і Сардзініі, не толькі павялічыць працягласць жыцця, але і палепшыць яе якасць, зрабіць даўгалецце актыўным. І вось тут галоўнае месца ў даследаванні – генетыцы. Трэба выявіць і сярод сардзінцаў, і сярод беларусаў генетычныя асаблівасці, схільнасць да той альбо іншай хваробы, скарэкціраваць лад жыцця і захаваць здароўе. Алена Міхаленка раскрывае некаторыя дэталі: калі выяўлена схільнасць да сардэчна-сасудзістых захворванняў, бранхіяльнай астмы альбо іншых хвароб — можна даць рэкамендацыі, якую дыету чалавеку выбраць, якая фізічная нагрузка будзе для яго найбольш карыснай. І такім чынам знізіць рызыку развіцця захворванняў. Такі своеасаблівы генетычны пашпарт чалавек атрымлівае з дзяцінства, а з цягам часу настолькі ўжываецца з рэкамендацыямі, што па–сутнасці, такі пашпарт становіцца галоўным жыццёвым арыенцірам у сэнсе здароўя. Генетычны пашпарт – гэта дакумент, у якім змяшчаюцца звесткі пра генетычныя асаблівасці чалавека. Менавіта гены ў вялікай ступені адказныя не толькі за нашу знешнасць і здольнасці, але і за наша здароўе. Таму вельмі важна вызначыць, да якіх захворванняў у чалавека ёсць схільнасць, асабліва калі яны залежаць не толькі ад генаў, але і ад ладу жыцця. Калі такая схільнасць выяўлена, можна правесці прафілактыку і прадухіліць хваробу. Генетычны аналіз, у тым ліку, дазваляе вызначыць індывідуальную адчувальнасць да лекаў. Дарэчы, лекі могуць аказваць на людзей розны ўплыў у залежнасці ад генетычных асаблівасцей. У кагосьці ад некаторых прэпаратаў могуць узнікнуць пабочныя эфекты, аж да смяротнага зыходу. Медыцына павінна быць персаналізаванай, а генетычны пашпарт – гэта перш за ўсё кіраўніцтва да дзеяння. Вучоныя з Сардзініі зацікавіліся такой работай беларускіх вучоных. Нашы навукоўцы таксама плануюць праводзіць генетычнае тэсціраванне на стрэсаўстойлівасць і іншыя псіхаэмацыянальныя асаблівасці чалавека. Пакуль тэхналогія ў стадыі распрацоўкі. З мінулага года пачалася рэалізацыя навуковай праграмы Саюзнай дзяржавы Беларусі і Расіі «ДНК-ідэнтыфікацыя», па якой вядуцца навуковыя даследаванні ў гэтай галіне. Работа надзвычай цікавая. Безумоўна, прынясе шмат адкрыццяў. Праўда, пакуль гаварыць пра вынікі гэтай праграмы рана, вядома толькі, што за даследаваннямі ўважліва сочаць крыміналісты дзвюх дзяржаў.
Каб пакінуць каментар, аўтарызуйцеся:
Войти как пользователь
Вы можете войти на сайт, если вы зарегистрированы на одном из этих сервисов: