Першыя словы ў беларускім радыёэфіры (аўдыё)

«Увага! Гаворыць Мінск! Радыёстанцыя РВ-10 iмя Саўнаркома БССР пачынае сваю работу на хвалi 1442 метры!» Менавіта такімі словамі ў Беларусі пачалося эфірнае радыёвяшчанне. Гэта адбылося ў нядзелю, 15 лістапада 1925 года, у 18:30. З дакладам па радыё выступіў кіраўнік ўрада БССР Іосіф Адамовіч. Тагачаснаму старшыні Саўнаркама было ўсяго 28 гадоў. Адной з задач маладога прэм'ера якраз і стала развіццё радыёвяшчання ў Беларусі. Спачатку слухачоў было няшмат – восенню 1925-га ў Мінску налічвалася каля 400 аматарскіх прыёмнікаў з навушнікамі. Аднак хутка стала зразумела: тэхнічная навінка беларусам даспадобы. Культурны адпачынак ля рэпрадуктара стаў модным, усё больш людзей жадалі абзавесціся індывідуальным прыёмнікам. Па матэрыялах кнігі І.Куркова «Мір жывога эфіру». На фота: станцыя кантролю якасці на беларускім радыё, 1930-я гады (ілюстрацыя з Нацыянальнага музея гісторыі і культуры Беларусі).