Рэпартаж з беларускіх дарог! Дзе могуць спыніцца «транзітнікі»?

З таго часу, як у нашай краіне вызначылі месцы для адпачынку і харчавання вадзіцеляў, запраўкі транспартных сродкаў з замежнымі нумарамі, прайшоў тыдзень. Усяго такіх пунктаў па краіне 43. Кантралюе сітуацыю транспартная інспекцыя. У адзін з рэйдаў адправіўся і наш карэспандэнт Яраслаў Даніленка.

Надзеўшы маскі і апрацаваўшы рукі антысептыкам разам з вядучым спецыялістам упраўлення кантролю на платных дарогах Сяргеем Сямухам адпраўляемся на трасу М1. Праз хвілін 20 дарогі прытарможваем каля аднаго з прыдарожных пунктаў адпачынку, які не ўваходзіць у спіс рэкамендаваных. Заўважаем фуру з замежнымі нумарамі. Уладзімір, так завуць вадзіцеля, едзе з Польшчы у Расію, але аб спецыяльных месцах для адпачынку пакуль не ведае.
  

Калі ўзяць сталічны рэгіён, то пунктаў, дзе могуць адпачыць і заправіцца «транзітнікі», чатыры. Два з іх на перасячэнні трас м1/м4. Сяргей Сямуха распавёў, што такой колькасці пляцовак цалкам хапае.

Пад’язджаючы да 78-ай запраўкі «Беларуснафты» бачым, як працаўнікі дэзінфіцыруюць дзвярныя ручкі. Дарэчы, санапрацоўка праходзіць кожныя дзве гадзіны, і не толькі ў памяшканнях, але і на палівараздатачных калонках. Майстар 78-ай АЗС Ігар Кузняцоў адзначыў, нягледзячы на дадатковую адказнасць, заправачная станцыя працуе ў штатным рэжыме.

Адзначу, жадаючых адпачыць на прапанаваных пляцоўках – не так ужо і шмат. На крыху аддаленай стаянцы – фура са славацкімі нумарамі. Дальнабольшчык Сцяпан даведаўся аб спецыяльных пунктах для «транзітнікаў» яшчэ падчас перасячэння дзяржаўнай мяжы.

На сёння дакладна вядома, што толькі ў Мінскай вобласці было выдадзена больш за 180 рэкамендацый тым вадзіцелям, якія праязджаюць транзітам па тэрыторыі Беларусі.