Падзяліцца:
Роздум. Ад фантастыкі да жыцця. Радыёблог Навума Гальпяровіча (аўдыё)
13 Ліпеня 2017
Роздум. Ад фантастыкі да жыцця. Радыёблог Навума Гальпяровіча (аўдыё) Нішто так не спрыяе асалодзе чытання добрых кніг, як летні адпачынак. Прынамсі, для мяне.Так было і на гэты раз, і пад шатамі стромых соснаў і бярозак на ўзбярэжжы Мінскага мора хораша чыталася і перачытвалася, балазе, у санаторскай бібліятэцы быў шырокі выбар твораў. Сіла сапраўднай значнай літаратуры праяўляецца ў самых розных напрамках. Адзін з іх – уменне мастака слова выклікаць роздум пра самыя балючыя і трапяткія пытанні сучаснасці, дзе кожны з чытачоў можа адчуць асацыяцыі з уласным лёсам і лёсам усяго чалавецтва. Да прыкладу, мае ўлюбёныя пісьменнікі-фантасты браты Стругацкія, Айзек Азімаў, Рэй Брэдберы, Артур Кларк і іншыя, нягледзячы на спецыфічнасць жанру, прымушаюць глядзець на нашы зямныя сённяшнія падзеі, думаць і разважаць пра наша паўсядзённае жыццё, пра тыя праблемы, якія паўстаюць у глабальным маштабе. І той апакаліпсіс, які часам паўстае ў іх творах як напамін і перасцярога ад згубных тэндэнцый, якія праяўляюцца, на жаль, у штодзённым жыцці нашай невялікай планеты. І тое, што адбываецца на прыдуманых імі тэрыторыях і грамадскасцях выклікае аналогію з тым, што адбываецца з намі ў сапрадным, невыдуманым жыцці. І мы бачым увачавідкі, да чаго прыводзяць войны і разбурэнні, братазабойства і псіхалогія выключнасці розных нацый, занядбання правоў іншых на свой лад жыцця. І зусім не ў фантастычных творах, а наяве ў розных кутках планеты ліецца кроў, гінуць ні ў чым не вінаватыя людзі, бушуюць кліматычныя катаклізмы. Ці не помсціць прырода чалавеку за бяздумнае і злачыннае ўмяшанне ў спракаветную сутнасць усяго жывога на зямлі? Так вось ад асалоды чытання любімых твораў вяртаешся да нашых штодзённых праблем, не прыдуманых, а зусім сапраўдных. Пра гэтыя праблемы ішла нядаўна гаворка тут, у нашым Мінску на летняй сесіі парламенцкай асамблеі АБСЕ. І што б хто ні гаварыў, а менавіта наша краіна выступіла ініцыятарам прапаноў, накіраваных на мір і згоду паміж дзяржавамі і народамі, на супрацоўніцтва і сяброўства. Правядзенне ў Мінску 26-й штогадовай сесіі Парламенцкай асамблеі АБСЕ стала адным з відавочных сведчанняў прызнання новай ролі Беларусі. Гэта было падкрэслена і падчас толькі што прайшоўшай нарады па прыярытэтах знешняй палітыкі дзяржавы з удзелам кіраўніка дзяржавы. Адзначана, што ў выніку шматвектарнай палітыкі Беларусі мы дасягнулі новага ўспрыймання нашай краіны і ў свеце – як незалежнай міралюбівай дзяржавы, свайго роду донара бяспекі ў рэгіёне. Беларусь, якая спазнала горыч страт і разбурэнняў, перанесла столькі ліха і бедаў, заклікае палітыкаў імкнуцца да ўзаемаразумення, да выбудоўвання людскіх добрасуседскіх узаемаадносін. І гэта ў тым ліку будзе спрыяць таму, каб не спраўдзіліся змрочныя прагнозы пісьменнікаў-фантастаў.
Каб пакінуць каментар, аўтарызуйцеся:
Войти как пользователь
Вы можете войти на сайт, если вы зарегистрированы на одном из этих сервисов: