“Роздум. Добры пачатак – залог поспеху ва ўсіх справах.” Радыёблог Навума Гальпяровіча (аўдыё)

Пад адным небам У суседзяў у садзе наўсцяж Праз таполі імкнецца святло. Дожджык раптам пайшоў, і гучней Шолах лісцяў я чую праз шкло. Мне не спіцца, сяджу ля вакна, Адзінока і ціха вакол, Так і быў быў бы адзін, ды ляцяць Зноў чародкі начных матылькоў. Цудоўныя радкі, праўда? А напісаў гэта Су Шы, вялікі кітайскі паэт яшчэ ў 11-м стагоддзі. Напісаў, безумоўна, па-кітайску, а я пераўвасобіў па-беларуску з падрадкоўніка, які прафесійна і дакладна склалі перакладчыкі – тонкія знаўцы мовы. Гэта з беларускамоўнага зборніка вершаў паэта «Подых усходняга схілу», які толькі што выйшаў у выдавецтве “Мастацкая літаратура”. А ўвогуле гэта ўжо дванаццатая кніга кітайскай паэзіі з серыі “Светлыя знакі: паэты Кітая”. Дарэчы, у серыі існуе міжнародны рэдакцыйны савет, у які ўваходзяць і прадстаўнікі навуковай і творчай інтэлігенцыі Кітая. Да нядаўняга часу актыўна развіццю серыі спрыяў славуты кітайскі перакладчык Гаа Ман. Саюзам пісьменнікаў Беларусі ён адзначаны знакам «За вялікі ўклад у літаратуру». Я пачаў размову пра нашы стасункі з паэзіі, таму што кітайскі народ надзвычай высока цэніць паэтычнае слова і думку, і каб лепш зразумець важнасць і важкасць нашай агульнай дружбы, трэба ведаць здабыткі культуры нашых народаў. Я думаю, што да тых значных агульных праектаў, як “Шаўковы шлях” і Індустрыяльны парк “Вялікі камень”, іншых, а таксама сумесных эканамічных узаемаадносін, дадасца важкі гуманітарны чыннік – турызм. Тым больш, што 2018 год у Кітаі абвешчаны годам турызму ў Беларусь. Зрэшты, узаемныя паездкі дэлегацый, прадстаўнікоў грамадскіх арганізацый сталі трывалай традыцыяй. Дарэчы, у гэтыя дні ў рэспубліканскім аздараўленчым дзіцячым лагеры “Зубраня”, што ў Мядзельскім раёне, адпачываюць і дзеці з Кітая. І, безумоўна, надзвычайнае значэнне мае падпісанае ўзаемнае пагадненне аб бязвізавым рэжыме паміж нашымі краінамі, якое ўступіла ў сілу 10 жніўня. З падпісаннем дакумента Беларусь апынулася ў ліку нямногіх краін Еўропы, у якіх устаноўлены бязвізавы рэжым з Кітаем. Надзвычайны і паўнамоцны пасол КНР у Беларусі Цуй Цымін у шматлікіх інтэрв’ю адзначыў, што дзякуючы бязвізаваму рэжыму, жыхары дзьвух краін будуць часцей падарожнічаць і змогуць больш даведацца пра сваіх сяброў. “Гэта ўмацуе нашу дружбу “, - сказаў ён. Так, гэта яшчэ адзін важкі крок да больш глыбокага ўзаемаразумення і сяброўства нашых народаў. Вялікі Кітай і не вялікая ў параўнанні з ім Беларусь могуць стаць прыкладам самых цесных і шчырых узаемастасункаў. Нават ёсць чаму павучыцца ў нашых сяброў у самых розных сферах чалавечай дзейнасці, і партнёрам, думаецца, цікава будзе лепш зразумець менталітэт і душу нашага народа. У Кітаі існуе старажытная прымаўка: «Добры пачатак – залог поспеху ва ўсіх справах». У сваю чаргу госць для беларуса заўсёды з’яўляўся асобай жаданай. У народзе казалі: “Добраму госцю вароты самі расчыняюцца”. Вось гэтыя мудрыя залацінкі з фальклору нашых народаў і ёсць залог нашага трывалага і шчырага сяброўства.