Падзяліцца:
"Розгалас. Каб любіць Беларусь нашу мілую, трэба ездзіць па ёй часцей". Радыёблог Максіма Угляніцы (аўдыё)
13 Жніўня 2018
"Розгалас. Каб любіць Беларусь нашу мілую, трэба ездзіць па ёй часцей". Радыёблог Максіма Угляніцы (аўдыё) Каб любіць Беларусь нашу мілую, трэба ў розных краях пабываць, - пісаў паэт, і мы не будзем з ім спрачацца, хоць часам і кажуць: калі любіш – не параўноўваеш. Усё ж некаторыя рэчы лепш заўважныя на кантрасце і на адлегласці. Але, на мой погляд, справядліва было б сказаць і так: каб лепш разумець нашу Беларусь (ды і больш любіць – таксама), трэба пабываць і ў розных ЯЕ краях.
На жаль, у многіх не хапае на гэта часу. А яшчэ часцей – проста не ведаем, колькі цікавых месцаў ёсць у роднай краіне. Чарговы раз злавіў сябе на гэтай думцы нядаўна, рыхтуючыся да эфіру нашай праграмы «Такі дзень». Мы абмяркоўвалі спіс цікавых мясцін Мінска, складзены аўстралійскай журналісткай для патэнцыйных бязвізавых турыстаў, а пасля правялі міні-апытанне на сталічных вуліцах: што ўвогуле цікавага можна паглядзець у Беларусі? Скажу шчыра: тое, што прачытаў і пачуў, не вельмі ўразіла. Традыцыйныя ўжо «праспект Незалежнасці-Кастрычніцкая-Зыбіцкая» (гэта ў Мінску) і «Мір-Нясвіж-багатая прырода» (гэта па краіне ў цэлым).
Магчыма, фокус у тым, што я ўспрымаў гэтыя рэкамендацыі не як турыст з іншай краіны, а як чалавек, які сто разоў па тых праспектах і вуліцах хадзіў? Але пагадзіцеся, сёння такія часы, што прыцягнуць увагу можа толькі штосьці незвычайнае, адметнае. У інтэрнэце – акіян інфармацыі і мільён карцінак, і калі вока не зачапілася, калі не падумаў «О! Гэта цікава!», то нічога не будзе.
А самае дрэннае, што я зразумеў: вось так спытай мяне знянацку – што цікавага ў вас паглядзець? - таксама наўрад ці адразу адкажу. Або ўсё тыя ж стандартныя варыянты прыгадаю. Таму вырашыў: трэба тэрмінова скласці спіс цікавых мясцін Беларусі! Не столькі для патэнцыйных замежных турыстаў, колькі для сябе. І пакуль лета не скончылася, абавязкова пабываць хоць у некаторых з іх, калі яшчэ не бываў. Давайце ж разам возьмем карту Беларусі і адзначым для пачатку хоць некалькі цікавых кропак на ёй.
«Вакол свету па Беларусі». І перш за ўсё прыгадаю адразу некалькі назваў, якія на слых могуць падацца вам вельмі знаёмымі. У інтэрнэце нават склалі адмысловы маршрут, які паўжартам назвалі «беларускай кругасветкай». Пачынаецца ён у Турыне, а далей Манголія – Парыж – Малі – Самалі – Бенін – Балі – Косава – Сахалін – Дублін. Так, гэта ўсё – беларускія населеныя пункты, назвы якіх графічна супадаюць з назвамі іншых гарадоў і нават цэлых краін. Спецыяльна падкрэсліваю – графічна, бо гучаць некаторыя з іх усё ж інакш.
Калі ж адхіліцца ад гэтага маршруту (тым больш замкнёнага кола, як у сапраўднай кругасветцы, там не атрымліваецца) можна яшчэ заехаць у Літву, Місуры, Палесціну, Каўказ або Байкал. Так, гэта ўсё таксама ў Беларусі. Карацей, аматарам выкладваць у сацсеткі незвычайныя фота трэба толькі знайсці дарожныя ўказальнікі з назвамі гэтых населеных пунктаў, сфатаграфавацца на іх фоне – а далей вы самі ведаеце, што рабіць.
«Незвычайныя назвы». Калі ж для тых жа мэт вам патрэбныя не назвы гарадоў і краін свету, а проста незвычайныя назвы, то вось яшчэ некалькі варыянтаў. Вёскі Юпіцер і Марс – абедзве не толькі размешчаны ў адным раёне, Дзяржынскім, але нават мяжуюць адна з адной! У Мінскай вобласці ёсць і вёска Венера. Хтосьці яшчэ сумняецца, што Беларусь касмічная дзяржава? На Віцебшчыне размешчаны вёскі з назвамі Шо і Яя. А яшчэ пашукайце на карце мястэчкі Іст, Уць, Ксты, Ёні, Уна, Эрд і шмат іншых – інтэрнэт вам у дапамогу!
«Міёрскі вадаспад». Калі ж вас як турыста цікавіць не назва, а месца само па сабе, то вось чарговая падказка: беларускі вадаспад. Ён знаходзіцца на невялічкай рацэ Вяце, у Міёрскім раёне Віцебскай вобласці. Да свайго сораму я даведаўся пра гэты цікавы турыстычны аб'ект зусім нядаўна. Так, вадаспад гэта не прыродны, а тэхнічны, створаны чалавекам – больш за 100 гадоў таму на гэтым месцы была электрастанцыя, якая давала энергію папяровай фабрыцы. Але ў любым выпадку выглядае вадаспад і навакольныя мясціны проста шыкоўна. Я для сябе вырашыў: трэба ехаць!
«Мазырскія яры». Працягваючы «водную» тэму, я абавязкова параіў бы пабываць падчас разліву рэк на Палессі. Напрыклад, у Мазыры. Ужо на пад'ездзе да гароду адкрыюцца незвычайныя віды. Яшчэ адна адметнасць гэтых месцаў - ландшафтны заказнік «Мазырскія яры», знакаміты сваім унікальным рэльефам: сістэма ўзвышшаў з крутымі схіламі, пакрытымі густой расліннасцю – чымсьці падобна да карпацкіх гор. Цікава, што фактычна яры знаходзяцца ў межах самога Мазыра, таму абавязкова праедзьце па горадзе на аўтамабілі – будзеце адчуваць сябе амаль што, як на дне невялікага «каньёна».
«Плывучая гасцініца». Працягваючы падарожжа па Палессі, я параіў бы абавязкова заехаць у Тураў. На жаль, сам дабраўся ў гэты вызначальны для беларускай гісторыі горад толькі нядаўна, дый паглядзеў далёка не ўсё, што жадаў. У Тураве можна сумясціць пазнавальны турызм з прамысловым – пабываць на мясцовым малочным камбінаце, дзе робяць знакамітыя беларускія сыры з італьянскімі назвамі. А таксама – адправіцца ў рачны круіз па Прыпяці на плывучай гасцініцы. Праўда, мяркуючы па цэнах на сайце, каштуе такая паездка не танна. Зрэшты, калі эмоцыі застануцца надоўга, затраты акупяцца.
Куды яшчэ можна адправіцца? У кукурузныя лабірынты (мяркуючы па інтэрнэце, іх цяпер у Беларусі некалькі, а год таму быў толькі адзін), на Нарач – але не азёрную, а гістарычную, цесна звязаную з баямі Першай сусветнай вайны. Ды ў той жа «традыцыйны» Нясвіж! Але калі вы там ужо бывалі не раз, звярніце ўвагу не на палац, а на паркі побач з ім. Часам здаецца, што там само паветра – гаючае. Цудоўная магчымасць для рэлаксацыі пасля працоўных подзвігаў.
А якія, на ваш погляд, самыя цікавыя мясціны ў Беларусі? Што можна параіць патэнцыйнаму турысту?
Каб пакінуць каментар, аўтарызуйцеся:
Войти как пользователь
Вы можете войти на сайт, если вы зарегистрированы на одном из этих сервисов: