Падзяліцца:
«Вердыкт. Прыватныя ініцыятывы сёння патрэбны эканоміцы!» Радыёблог Леаніда Новікава (аўдыё)
18 Сакавіка 2019
«Вердыкт. Прыватныя ініцыятывы сёння патрэбны эканоміцы!» Радыёблог Леаніда Новікава (аўдыё) Сёння пачынаецца ІV Тыдзень беларускага прадпрымальніцтва, які будзе доўжыцца да 24 сакавіка. Так супала, што тым ліберальным нарматыўна-прававым актам, накіраваным на разняволенне бізнесу ў краіне, споўніўся год. За гэты час, дзякуючы аптымізацыі нарматыўнай базы, дзелавая актыўнасць грамадзян павысілася. І на мерапрыемствах Тыдня будуць падведзены папярэднія вынікі лібералізацыі адносін у гэтай важнай сферы. Напярэдадні ў Рэспубліканскай канфедэрацыі прадпрымальніцтва прадстаўлена праграма, партнёры і праекты ІV Тыдня беларускага прадпрымальніцтва. Чакаюцца сустрэчы бізнесу і ўлады з мясцовай тэматыкай, акцыі ў навучальных установах “Прадпрымальнікі аб прадпрымальніцтве”, “Дэманструем свой бізнес”. 20 сакавіка Рэспубліканская канфедэрацыя прадпрымальніцтва ў Нацыянальнай бібліятэцы арганізуе Рэспубліканскі дзелавы форум “Прадпрымальніцтва ў Беларусі: стратэгія і тактыка”. Важна, што мерапрыемствы разгортваюцца па ўсёй рэспубліцы. Напрыклад, Гродзенская абласная асацыяцыя прадпрымальніцтва арганізуе прафарыентацыйны КВЗ “Я выбіраю”. У Брэсцкім абласным цэнтры садзейнічання малому бізнесу і ў СШ-27 Гродна будуць арганізаваны індывідуальныя кансультацыі “Практычныя аспекты дзейнасці вучнёўскіх бізнес-кампаній” і дапамога ў адкрыцці бізнесу. У Гродзенскім дзяржаўным універсітэце імя Янкі Купалы, Гродзенскім дзяржаўным аграрным універсітэце і 27-й СШ Гродна пройдзе акцыя “Прадпрымальнікі аб прадпрымальніцтве”. У 37-й, 46-й, 186-й школах Магілёва пройдуць вэбінары “Школьнае прадпрымальніцтва: актуальнае пытанне” і акцыя “Адкрыты ліст прадпрымальніку”. Падрыхтоўка да ІV Тыдня беларускага прадпрымальніцтва выявіла шэраг ініцыятыў. Флагманскія праекты – новая форма работы Рэспубліканскай канфедэрацыі прадпрымальніцтва. Адзін з такіх праектаў – як ператварыць Беларусь у ІТ-краіну – прэзентаваў у Рэспубліканскай канфедэрацыі прадпрымальніцтва яе старшыня, генеральны дырэктар Закрытага акцыянернага таварыства “БелХардГруп” Ігар Мамоненка. Другі праект, які ў канфедэрацыі вылучылі ў флагманскія, – удасканаленне заканадаўства ў галіне інвесціравання АПК. За яго рэалізацыю адказвае заснавальнік таварыства з абмежаванай адказнасцю “Сельгасінвест” Антон Касынкін. І за межамі Тыдня Рэспубліканская канфедэрацыя прадпрымальніцтва ў красавіку правядзе ў “Чыжоўка-Арэне” маштабную акцыю “Абуджэне-2” па далучэнні моладзі да прадпрымальніцтва з удзелам пяці тысяч чалавек. А яшчэ ў планах канфедэрацыі прапановы ў “Нацыянальную платформу бізнесу Беларусі-2019”, правядзенне рэспубліканскага конкурсу на лепшыя горад, вобласць, раён для бізнесу ў Беларусі, развіццё вучэбных бізнес-кампаній, стварэнне рэспубліканскай дзелавой сеткі Канфедэрацыі. Дэкрэт №7 Прэзідэнта Беларусі і спадарожныя нарматыўна-прававыя акты дазволілі многія завалы на шляху разняволення бізнесу расчысціць. Але нямала працы ў гэтым накірунку яшчэ застаецца. Памятаю, калі прымаліся гэтыя дакументы ў Беларусі, нехта Андрэй Новікаў з Усурыйска паслухаў ці пачытаў мой радыёблог і адгукнуўся рэплікай: “Новікаў, сам ты ў гэта верыш?” Вядома, перамены адбудуцца не адразу. У ліку мер па лібералізацыі бізнесу ў Беларусі мяркуецца ўдасканальваць і падатковае заканадаўства. І ўжо ў 2019 годзе Падатковы кодэкс стане больш простым і зразумелым у параўнанні з папярэдняй рэдакцыяй. Але ён усё роўна застаецца досыць складаным для разумення дакументам, адзначае дырэктар Бізнес-саюза прадпрымальнікаў і наймальнікаў імя Куняўскага Жанна Тарасевіч. На прыняцці новай рэдакцыі кодэкса працэс удасканалення фіскальнай сістэмы не спыніцца. Па прапанове Мінфіна ствараецца кансультатыўны савет, як пастаянна дзеючы орган, у рамках якога бізнес зможа ўносіць прапановы па паляпшэнні падатковага заканадаўства і фіскальнай сістэмы. У ідэале з рэалізацыяй дзяржавай мер падтрымкі прадпрымальніцтва павінен павысіцца ўзровень даверу прыватнага бізнесу да органаў дзяржкіравання. Ад гэтага залежыць паляпшэнне дзелавога клімату ў краіне. Дзяржава пачала надаваць большую ўвагу прыватнаму бізнесу, развіццё якога можа прынесці ў казну дадатковыя даходы. Гэта адзін з пунктаў росту эканомікі. У бізнес-колах не выключаюць, што пры пэўных умовах уклад малога бізнесу ў эканоміку можна ў бліжэйшы час давесці да 50%. Эканоміцы сёння вельмі патрэбны прыватныя ініцыятывы.
Каб пакінуць каментар, аўтарызуйцеся:
Войти как пользователь
Вы можете войти на сайт, если вы зарегистрированы на одном из этих сервисов: