Падзяліцца:
“Забойца Netflix” ці тэлебачанне для хатніх гаспадынь? Што стала вядома пра новы сэрвіс Apple пасля прэзентацыі. Кропкі над “і”. Радыёблог Аляксандра Шустэра (аўдыё)
27 Сакавіка 2019
“Забойца Netflix” ці тэлебачанне для хатніх гаспадынь? Што стала вядома пра новы сэрвіс Apple пасля прэзентацыі. Кропкі над “і”. Радыёблог Аляксандра Шустэра (аўдыё)

Эх, не тыя ўжо прэзентацыі ў Apple, не тыя. Мінулі часы, калі Стыў Джобс мог некалькі гадзін “трымаць” аўдыторыю, а на наступны дзень “яблычныя” крамы ламіліся ад тых, хто хацеў новы прадукт. Гэта мог быць і рэвалюцыйны айпод, і “шляпа” накшталт першага макбука, але вы адразу разумелі, што марылі пра яго ўсё жыццё. Сам геній маркетынгу ніколі не хаваў, што арыентаваўся не на патрэбы рынку, а на ўласны густ і здольнасць пераканаць любога, што без новага гаджэту – ну ніяк. Так стратэгія “супраць плыні” сама параджала плынь, а Apple заўсёды меў “права першай ночы”, няхай канкурэнты потым і выпускалі прадукт больш дасканалы і менш дарагі - магія брэнда, вакол якога сфарміраваўся сапраўдны культ, нікуды не знікала.

Пра Джобса цяпер нагадвае толькі імя тэатра, дзе адбываецца прэзентацыя. А ў выпадку са стрымінгавым сэрвісам усё наадварот. Кампанія спахапілася, калі рынак, па сутнасці, падзялілі гіганты Netflix і Amazon, і ад прэзентацыі ў Куперціна чакалі нават не імён і прэм’ер, а выразнай стратэгіі – за кошт чаго Цім Кук збіраецца дагнаць і абагнаць лідараў. Тое, што мы чулі раней –“плюшавы” сэрвіс з кантэнтам 6+ (я ўтрырую, але) – прарывам не бачылася. Прадставілі ж менавіта праекты. І яны – па меншай меры ў цяперашнім выглядзе - поўнасцю трапляюць у катэгорыю “новае кабельнае тэлебачанне для ўсёй сям’і”.

Так, Стывен Спілберг здыме працяг “Дзіўных гісторый”, што выходзілі на амерыканскім тэлебачанні ў 80-я. (І гэта калі яшчэ свежыя ў памяці вашы, містар Спілберг, нападкі на оскараўскіх намінантаў ад Netflix – маўляў, месца ім самае большае на тэлепрэміі Эмі). Добра, ёсць фэнтэзі-казка на выхадныя.

«Ранішняе шоў» - гэта ўжо нават не кабельнае, а класічнае ТБ; вядучымі заяўлены Стыў Карэл (нядрэнна), Рыз Уізерспун і Джэніфер Эністан (спадзяюся, яны хаця б на сцэнарыстаў раскашэляцца). Тут жа - дзіцячая праграма ад стваральнікаў «Вуліцы Сезам».

Фантастычны серыял «Глядзі», пра людзей, якія нараджаюцца невідушчымі - з Джэйсанам Мамоа і докудрама «Мара імігранта», заснаваная на рэальных гісторыях людзей, якія пераехалі ў ЗША. Аўтар – вядомы па хіце “Каханне-хвароба” Кумаіл Нанджыані. Ну вось, ужо штосьці падобнае на Netflix з яго “Птушыным кошыкам” і “Дзікай-дзікай краінай”.

   Вас уражвае? Мяне – не надта. Думаю, і канкурэнты калі і напружыліся пасля дэкларацыі аб намерах, то цяпер уздыхнулі з палёгкай. Каму гэта выклік – “Амазону” з яго гіганцкім праектам па сусвеце “Уладальніка пярсцёнкаў”? HBO з новым серыялам-прыквелам “Гульні тронаў”? Ці можа “Дысней” задрыжаў перад адкрыццём уласнай платформы – з правамі на фільмы “Марвэл” і “Зорныя войны”?..

На многія з пытанняў кіраўнікі Apple так і не далі адказаў. Яшчэ ў верасні адзін з артыкулаў, у якім абмяркоўвалася магчымыя праекты, выйшаў пад загалоўкам «Ніякага сэксу, калі ласка, мы - Apple». Аўтар сцвярджаў: Цім Кук настойвае, каб новы сэрвіс адпавядаў сямейнаму брэнду кампаніі - быў без сэксу, гвалту, жахаў, вострых тэм і ўсяго, што складае аснову папулярнасці сучасных серыялаў. Няхай жыве паліткарэктнасць і жыццёсцвярджальнасць! Так гэта ці не, мы ўбачым толькі ўвосень, але калі меркаваць па промароліках, у серыялах сапраўды няма і намёку на сэкс і гвалт.

З іншага боку, не зрабіць крок у гэтым напрамку Apple не магла – і не толькі рэпутацыйна (як кампанія, што прывыкла быць у авангардзе запуску новых тэхналогій). У час, калі Netflix траціць на ўласны кантэнт 14 мільярдаў у год – на адзін будзе складана не тое што пацясніць, але нават наблізіцца. І ў гэтай сувязі многія аглядальнікі лічаць – а што, калі “яблычныя” і не збіраюцца канкурыраваць?.. Усё ж, іх асноўны рынак – не кантэнт, а тэхніка. А навіны, кнігі, музыка і нарэшце серыялы – гэта проста яшчэ адзін аргумент на карысць выбару новага тэлефона, планшэта або камп’ютара. Аматары ж серыялаў у любым выпадку застануцца ў плюсе – якаснага прадукта шмат не бывае.

Каб пакінуць каментар, аўтарызуйцеся:
Войти как пользователь
Вы можете войти на сайт, если вы зарегистрированы на одном из этих сервисов: