news.by
Як і чым апрацоўваецца сталічная падземка?
У Беларусі ўзмоцнена дэзінфекцыя грамадскага транспарту. Аўтобусы, электробусы, тралейбусы і трамваі апрацоўваюць двойчы ў дзень. Таксама раз у суткі дэзінфіцыруюцца прыпыначныя пункты і арганізуецца вільготная ўборка пешаходных пераходаў. Аналагічныя працэдуры чакаюць і метро. Апроч іншага, у метрапалітэне для пасажыраў пачалі ўстанаўліваць бескантактавыя сэнсарныя дазатары.
Каля 40% пасажыраў у Мінску для перамяшчэння выбіраюць метро. Менавіта таму прымаюцца ўсе неабходныя меры для бяспекі пасажыраў. У прыватнасці, на станцыях метрапалітэна штодня апрацоўваюцца дзвярныя ручкі, паверхні турнікетаў, лаўкі, поручні і касавыя зоны. У апошніх, пры куплі білетаў, пасажырам рэкамендуюць трымаць дыстанцыю. Нагадваюць аб гэтым чырвона-белыя лініі на падлозе. Калі асноўная ўборка станцый і вестыбюлей ладзіцца ноччу, то аператыўная праводзіцца, як мага часцей на працягу дня. А каб развесці пасажырапатокі, у працоўныя дні з 9 да 10 гадзін скарочаны інтэрвал руху цягнікоў. Прычым як на сіняй, так і на чырвонай лініях. Такім чынам, у гэты час пачакаць цягнік на платформе прыйдзецца не больш за дзве хвіліны, адзначыў прэс-сакратар сталічнага метрапалітэна Андрэй Дроб.
"Работы выконваюцца ў адпаведнасці з тэхналагічнымі працэсамі, распрацаванымі на кожны від тэхнічнага абслугоўвання. Перад заходам у дэпо, цягнікі праходзяць праз мыйны, ажыццяўляецца санітарная ўборка ўнутры вагонаў як ручным спосабам, так і метадам арашэння, з ужываннем адмысловых сродкаў. Мыюцца падлогі вагонаў, апрацоўваюцца поручні, сядзенні, шкло, аконныя праёмы, дзверы, сцены і рашоткі вентыляцыйных каналаў. Таксама не забываюць правесці ўборку рэкламных планшэтаў, схем і таблічак".
Для больш эфектыўнай прафілактыкі каранавіруснай інфекцыі разглядаюцца і іншыя меры бяспекі. У прыватнасці, устаноўка цеплавізарных датчыкаў. Падобныя сістэмы дзейнічаюць у аэрапортах.
Аўтар: Яраслаў Даніленка
Фота: http://metropoliten.by/