Тыдзень памяці Генадзя Гарбука – «Тэатр Беларускага радыё», 19 – 28.03.2018

У «Тэатры Беларускага радыё» з 19 па 28 сакавіка праходзіць «Тыдзень светлай памяці народнага артыста Беларусі Генадзя Гарбука». Да апошніх дзён свайго жыцця Генадзь Гарбук аддана служыў Купалаўскаму тэатру. У яго творчай біяграфіі – паўсотні цудоўных роляў у самых розных тэатральных спектаклях і амаль столькі ж – у кіно. Напэўна, самыя знакавыя з іх – Васіль Дзятлік ў «Людзях на балоце» Мележа, Пятрок у «Знаку бяды» Быкава, Лапатуха ў «Чорным замку Альшанскім» Караткевіча, Андрэй Ходас у «Белых Росах» Дударава ды іншыя. Ну а калі палічыць яшчэ і работы Генадзя Міхайлавіча на Беларускім радыё, іх агульная агульная колькасць узрасце ці не ўдвая. Вобразы, створаныя гэтым артыстам, надзвычай яркія, запамінальныя, у яго асобе насамрэч сканцэнтравалася энергетыка беларускага характару. Ён пакінуў нас сёлета, 7 лютага, на 84-м годзе жыцця, але разам з намі застанецца глыбокі і драматычны свет яго Мастацтва. На гэтым тыдні ў «Тэатры Беларускага радыё» прагучаць наступныя радыёспекталі з удзелам Генадзя Гарбука: «Градабой» Паўла Місько – 19-20 сакавіка, «Адзін лапаць, адзін чунь» Міхася Стральцова – 21-22 сакавіка, «Люцынка альбо шведы на Літве» Вінцэнта Дуніна-Марцінкевіча – 23-24 сакавіка, «Паляванне на Апошняга Жураўля» Алеся Жука – 25-26 сакавіка, «Крыж» Аляксея Дударава – 27-28 сакавіка. Пачатак эфіру – 22-05.